"CIDය ලැජ්ජා විය යුතුයි" - විනිසුරු මඩුල්ල කියයි

2020-02-24 11:40:00       732
feature-top
හිටපු නාවික හමුදාපති වසන්ත කරන්නාගොඩ ඇතුළු 14 දෙනෙකුට එරෙහිව ගොනු කර ඇති නඩුව අද (24) කොළඹ ත්‍රිපුද්ගල මහාධිකරනයේ දී කැඳවා තිබුණා.   

ඒ 2008 සහ 2009 යන වසරවලදී කොළඹ හා ඒ අවට ප්‍රදේශවල පුද්ගලයන් 11 දෙනෙකු පැහැර ගෙන ඝාතනය කිරීමට කුමන්ත්‍රණය කිරීමේ චෝදනාවට නීතිපතිවරයා විසින් පවරා ඇති නඩුවක් සම්බන්ධයෙන්   

එහිදී හිටපු නාවික හමුදාපති වසන්ත කරන්නාගොඩ අද දින ද අධිකරණයේ පෙනී නොසිටි අතර ඔහුට අධිකරණයේ පෙනී සිටීමට ත්‍රිපුද්ගල විනිසුරු මඩුල්ල යළි නොතීසි නිකුත් කළා.

එම සිතාසි ඔහුගේ පදිංචි ලිපිනයට ලියාපදිංචි තැපෑලෙන් සහ ආරක්ෂක අමාත්‍යාංශයේ ලේකම්වරයා මාර්ගයෙන් යොමු කරන ලෙසට ත්‍රිපුද්ගල විනිසුරු මඩුල්ල නියෝග කළා.

14 වන විත්තිකරු වන කරන්නාගොඩට සිතාසි ලබා දීමට නොහැකි වීම සම්බන්ධයෙන් අපරාධ පරීක්ෂණ දෙපාර්තමේන්තුව ලැජ්ජා විය යුතු බව ත්‍රිපුද්ගල විනිසුරු මඩුල්ල අවධාරණය කරන ලදි.

කරන්නාගොඩට සිතාසි භාර දීමට නොහැකි වූ බවයි අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේ.  මෙම නඩුව යළි මාර්තු මස 20 වැනිදා කැදවීමට දින නියම කරන ලදි.   

මේ අතර මෙම නඩුවට අදාළ විමර්ශනවල මුල් ලේඛන ජනාධිපති කොමිෂන් සභාව වෙත අපරාධ පරීක්ෂණ දෙපාර්තමේන්තුව භාර දී ඇති බවට නීතිපතිවරයා අද (24) අධිකරණයට දැනුම් දුන්නා.

එම ලේඛන නැවත ලබා ගැනීමට කටයුතු කරන ලෙසට අධිකරණය අපරාධ පරීක්ෂණ දෙපාර්තමේන්තුවට නියෝග කරන ලදි.  

නාවික හමුදාවේ නිළධාරීන් වන D.K.P. දසනායක, සම්පත් මුණසිංහ , සුමිත් රණසිංහ, ඩිලන්ක සේනාරත්න, නලින් ප්‍රසන්න වික්‍රමසූරිය, ඇන්ටන් ප්‍රනාන්දු, රාජපක්ෂ පතිරනලගේ කිත්සිරි, අරුණ තුෂාර මෙන්ඩිස්, කත්‍රිආරච්චිගෙ ගාමිණී, චන්දන ප්‍රසාද් හෙට්ටිආරච්චි නොහොත් නේවි සම්පත්, උපුල් චමින්ද, නන්දප්‍රිය හෙට්ටිහැන්දි සහ සම්පත් ජනක පෙරේරා යන අය අද අධිකරණයේ පෙනී සිටියා.


(under the courtesy of nethnews.lk news web)

More News »