අගමැති රනිල් සුදු වෑන් පැහැර ගැනීම් කලේ යයි බටලන්ද කොමිෂන් වාර්තාවෙන් චෝදනා..

2019-08-17 12:22:00       695
feature-top
පිවිතුරු හෙල උරුමයේ නායක පාර්ලිමේන්තු මන්ත‍්‍රි උදය ගම්මන්පිල මහතා එම පක්‍ෂ මූලස්ථානයේදී පැවති මාධ්‍ය හමුවකදී මෙම අදහස් පල කලේය.

‘අගමැතිතුමා යාපනයේ රැස්වීමක් අමතමින් පැවසුවේ රාජපක්ෂ යුගයේ දී සුදු වෑන් වලින් පුද්ගලයින් පැහැර ගැනීම් සිදු වුණු බවයි. ඒ යුගය යලි උදාවෙන්නයි යන්නේ කියල රට බය කරන්නයි හදන්නේ. නමුත් රනිල් වික්‍රමසිංහ මැතිතුමාට සෘජුව චෝදනා එල්ල වුණු බටලන්ද ජනාධිපති කොමිසමේ වාර්තාව සඳහන් කරන්නේ 1987 සිට 1989 දක්වා යුගයේ සුදු වෑන් වලින් පැමිණ පුද්ගලයින් අතුරුදහන් කළ බවයි.

ජනාධිපති මහින්ද රාජපක්ෂ මැතිතුමාගේ දෙවන ධූර කාලයේ දී කිසිම මාධ්‍යවේදියෙකු සුදු වෑන් මගින් පැහැරගෙන යෑමක් වාරතා වෙන්නේ නැති බව ගයන්ත කරුණාතිලක මන්ත්‍රිතුමා 2016 මාරතු 10 දින පාරලිමේන්තුවට ප්‍රකාශ කළා. එහෙම නම් රනිල් වික්‍රමසිංහ මැතිතුමා ආරම්භ කළ සුදු වෑන් සංස්කෘතිය අවසන් කලේ මහින්ද රාජපක්ෂ මැතිතුමා කියන එක සඳහන් කරන්න පුළුවන්.

ආණ්ඩුවට විරුද්ධව සිටිය නිසා රවිරාජ් මන්ත්‍රිතුමා වගේම මහේෂ්වරන් මන්ත්‍රිතුමා ඝාතනය වුණත් ඒවාට වගකිවයුතු අය නීතිය ඉදිරියට පමුණුවන්න අපට බැරි වුණා කියලා අගමැතිතුමා චෝදනා කළා. හරි හරි අපට බැරි වුණා කියමුකො. ඉතින් පසුගිය අවුරුදු පහ පුරාවට තමන්ගේ මන්ත්‍රිවරුන් මැරුවේ කවුද කියලා සොයා ගන්න අගමැතිතුමාගේ ආණ්ඩුවටත් බැරි වුණානෙ. ඒ විතරක් නොවේ එජාපයේ ප්‍රබල නායකයෙකු වන ලලිත් ඇතුලත්මුදලි මැතිතුමා ඝාතනය කලේ කවුද කියා සොයා ගන්නවත් එජාපයට පුළුවන් වුණා ද? ඒ නිසා අපි “ඔවා දෙනු පරහට – තමා සම්මතයේ පිහිටා සිට” කියා අගමැතිතුමාට කියනවා.

ලංකා ඉතිහාසයේ විතරක් නොවේ ඉහළම තාක්ෂණය තිබෙන ඇමෙරිකාවේත් නොවිසඳුණු ප්‍රභූ ඝාතන තිබෙනවා. ඇමෙරිකානු ජනාධිපති ජෝන් එෆ් කෙනෙඩි ඝාතනය කිරීම පිටුපස සිටියේ කවුද කියන එක අදටත් අභිරහසක්’
(under the courtesy of lankacnews.com news web)

More News »