ෆේස්බුක් අවහිරය ඉවත් කිරීමට රජයෙන් කොන්දේසි

2018-03-13 10:38:00       770
feature-top
ජාතිවාදය සහ ජාතික ආරක්ෂාවට හානි වෙන වෙබ් අඩවි භාවිතයෙන් ඉවත් කිරිම ඇතුළු රජය ලබාදෙන කොන්දේසි ඉටුකිරිමට ෆේස්බුක් ආයතනය කටයුතු කළහොත් එම තහනම ඉවත් කිරිමට පියවර ගන්නා බව විදුලි සංදේශන ඩිජිටල් යටිතල පහසුකම් සහ විදේශ රැකියා අමාත්‍ය හරීන් ප්‍රනාන්දු මහතා පැවසීය.
ෆේස්බුක් ආයතනය සමඟ මේ පිළිබඳව දිගින් දිගටම සාකච්ඡා සිදුකරමින් සිටන බවත් ඔවුන්ගෙන් යහපත් ප්‍රතිචාරයක් ලැබෙනු ඇතැයි තමන් විශ්වාස කරන බවත් අමාත්‍යවරයා කියා සිටියේය.

ෆේස්බුක් තහනම සම්බන්ධයෙන් වැඩිදුරටත් අදහස් දැක්වූ අමාත්‍ය හරීන් ප්‍රනාන්දු මහතා මෙසේද කීය.

‘‘අපිට මේක දේශපාලන ප්‍රශ්ණයක් නෙමෙයි. නමුත් ජාතික ආරක්ෂාවට හෝ ජාතිවාදය අවුස්සන ප්‍රශ්ණ වලට ඉඩ ලබාදිය නොහැකියි.

මේ සම්බන්ධයෙන් තීරණයක් ගන්න ෆේස්බුක් ආයතනය නිර්දේශය දෙනකං තමයි අපි බලන් ඉන්නේ. ජාතිවාදය ඇතුළු කරුණු සම්බන්ධයෙන් වෙනස්කම් කරන්න කියලා අපි දිගින් දිගටම ඉල්ලීම් කරලා තිබුණට එම ආයතනය ඒ සම්බන්ධයෙන් කිසිදු පියවරක් අරගෙන තිබුනේ නැහැ.

මෙම ගැටළුවේදී මේක තමයි අපිට තිබුන ලොකුම බාධකය. නමුත් මේ අය දිගින් දිගටම මේ ගැන කිසිදු දෙයක් කරලා තිබුනේ නැහැ. ඒ අය කියන්නේ සිංහල කියවන්න පුළුවන් අය ඒ අයට අඩුය කියලා.

එදා දවසේ අපි මේ තීන්දුව ගත්තේ නැත්නම් මේ ප්‍රශ්ණය විසඳන්න ලැබෙන්නේ නැහැ. ෆේස්බුක් ආයතනය අපිට කියලා තියෙනවා මේ සම්බන්ධයෙන් කථා කරනවා කියලා. මේ සම්බන්ධයෙන් ෆේස්බුක් ආයතනයේ තීන්දුව ලබාදෙනකන් අපි බලාගෙන ඉන්නේ.

ජාතිවාදය සහ ජාතික ආරක්ෂාවට හානි වෙන බවට විදුලි සංදේශන නියාමන කොමිෂන් සභාව හෝ සර්ට් ආයතනය (Sri Lanka CERT) හෝ දෙන ඕනෑම වෙබ් අඩවියක් අයින් කරනවා කියන කොන්දේසිය ඔවුන් අපිට ලබා ලබාදිය යුතුයි.

ඒ වගේම සිංහල කියවන්න පුළුවන් වැඩි දායකත්වයක් ගන්න අය ෆේස්බුක් එකට ඇතුළත් කරගන්නවනම් අපි මේ තහනම ඉවත් කරගන්නවා කියන එක තමයි අපේ ස්ථාවරය’’ යැයිද ඔහු පැවසීය.

ශ්‍රී ලංකා සමාජ මාධ්‍ය ජාල පාලනය කිරීම සම්බන්ධව මේ වන විට අමාත්‍යංශය සහ විදුලි සංදේශ නියාමන කොමිසම එක්ව ෆේස්බුක් සමාගම සමග සාකච්ඡා පවත්වමින් සිටින බව පැවසු අමාත්‍යවරයා, ඒ සඳහා තම අමාත්‍යංශයට හා විදුලි සංදේශ නියාමන කොමිසමට ජනාධිපතිවරයා විසින් බලය පවරා ඇති බවද වැඩි දුරටත් සඳහන් කළේය.

(under the courtesy of srilankamirror.lk news web)

More News »