ලබාගත් ප්‍රජාතන්ත්‍රවාදී නිදහස රැකගන්න සියලු දෙනා එක්ව සජිත් ජනපති කරමු

Sep 30, 2019 09.26am
feature-top
ආණ්ඩුව ආරම්භ කළ ප්‍රජාතන්ත්‍රවාදී නිදහස තවදුරටත් ආරක්ෂා කර ගැනීම සඳහා එක්සත් ජාතික පෙරමුණ ඉදිරිපත් කරන සජිත් ප්‍රේමදාස මහතා ජයග්‍රහණය කිරීමට සියලු දෙනාම එකතු වී ක්‍රියා කරමු යැයි අගමැති රනිල් වික්‍රමසිංහ මහතා පැවසිය. අගමැති රනිල් වික්‍රමසිංහ මහතා මේ බව සඳහන් කෙළේ කොළඹ, අරලියගහ මන්දිරයේදී ඊයේ (29) සිවිල් සංවිධාන නියෝජිතයින් හමු වූ අවස්ථාවේදීය. එහිදි අගමැතිවරයා මෙසේද කීය.

එය පසුගිය වසර පහ තුළදී ලබා ගත් ප්‍රජාතන්ත්‍රවාදී අයිතිවාසිකම් තහවුරු කරන සටනේ පළමු වැනි පියවරයි.ලබා දුන් නිදහස ඉදිරියට ගෙන යෑම සඳහා වර්තමාන ආණ්ඩුව බලයේ සිටිය යුතුයි. ඒ සඳහා ජනාධිපතිවරණය දිනිය යුතුයි.අපි සියලූ දෙනාම එකට වැඩකරපු නිසා අද නිදහසේ කතා කරන්න පුළුවන්. නිදහසේ ක්‍රියා කරන්න පුළුවන්. ඒ සම්පූර්ණ ප්‍රජාතන්ත්‍රවාදී නිදහස අද ලංකාවේ තිබෙනවා.

අයුතු විදිහට ක්‍රියා කරන්නවත්, බලපෑම් කරන්න යන්නෙවත් නැහැ. සුදු වෑන් අද ලංකාවේ නැහැ. සුදු වෑන් සංස්කෘතිය අවසන් වෙලා තියෙනවා. පොලිසිය නීතිය ක්‍රියා කරනවා. එහෙනම් නිදහසේ අපට ජීවත් වෙන්න පුළුවන්. එපමණක් නොවෙයි. අපි මේ සංශෝධනය සම්පූර්ණයෙන්ම ක්‍රියාත්මක වුණාම ඒක තවත් ශක්තිමත් වෙනවා. කැබිනට් මණ්ඩලය සම්පූර්ණයෙන්ම පාර්ලිමේන්තුවට වගකියන්න සිදු වෙනවා.

පාර්ලිමේන්තුවේ රැස්වීම් අද ප්‍රසිද්ධියේ විකාශනය කරනවා. යට ගහන්නේ නැහැ. අපි ඒවා හංගන්න යන්නේ නැහැ. අද තියෙන්නේ නිදහස් මාධ්‍යයක්. ඒ මාධ්‍යයට කිසිම බලපෑමක් මෙතැන සිදුවෙන්නේ නැහැ. ඒ නිදහස අපි ආරක්‍ෂා කර ගත යුතුයි. තොරතුරු ලබාගැනීමේ නිදහස, මානව හිමිකම්, ශ්‍රේෂ්ඨාධිකරණය, අභියාචනාධිකරණය, අධිකරණ සියල්ලම අද ස්වාධීනව කටයුතු කරනවා.

අපිට පුළුවන් වුණා සුළුතරයක් තිබුණත් මේ නිදහස ඇති කර ගන්න. සංහිදියාව ඉදිරියට ගෙන යන්න. රටේ ඒවගේම අධ්‍යාපනය, සෞඛ්‍ය, ගම්වල යටිතල පහසුකම් ඒ පිළිබඳ විශාල මුදලක් ආයෝජනය කරලා දියුණුවක් ඇති කරගන්න ඕනෑ. එක උදාහරණයක් තමයි සුරක්‍ෂා. සෑම දරුවෙක්ම අපි රක්‍ෂණය ලබාදෙන එක. තව කාරණයක් තමයි ස්ටෙන්ට් ලබා දෙනවා. අද ගිලන්රථ සේවය තිබෙනවා.

අලූත් ව්‍යවස්ථාව සම්මත කරන්න ඕනෑ. ඒ නිසයි නිදහස ඉදිරියට ගෙන යන්න ඊළඟ අවුරුදු කිහිපය වැදගත්. ඒ අවුරුදු කිහිපය වැදගත් නම් එසේ නම් මේ ආණ්ඩුව බලයේ සිටිය යුතුයි. මේ ආණ්ඩුව බලයේ සිටීමට ජනාධිපතිවරණය දිනන්න ඕනෑ. අපේ අපේක්‍ෂකයා හැටියට අපේ පක්‍ෂයේ නියෝජ්‍ය නායක සජිත් ප්‍රේමදාස මහතා ඉදිරිපත් කළා. එතැනින් අපි බලාපොරොත්තු වෙන්නේ පාර්ලිමේන්තු ඡන්දයත් ජයග්‍රහණය කරන්න. බහුතරයක් ලබාගන්න.

සුළුතරයක් හැටියට කරන්න බැරි වුණ වැඩ කටයුතු බහුතරයක් හැටියට ආණ්ඩුවේ කරන්න. මේ නිදහස ආරක්‍ෂා කරන්න. අපිට කොච්චර බැන්නත්, මොනතරම් අපේ අඩුපාඩු තිබුණත් මතක තියාගන්න නිදහස තිබෙන බව පෙන්වන්න. අපිට දොස් කියන්න නිදහස තියෙනවා. ඒ තමන්ගේ නිදහස. අපි එය අරගෙන නැහැ. ඒ ජනතා නිදහස පිළිගන්නවා. මේ රටේ සියලූ දෙනාම ශ්‍රී ලාංකිකයන් හැටියට අපි පිළිගන්නවා. ඉතිං අපි මේවා ආරක්‍ෂා කෙළේ නැද්ද?.

මොකද්ද විකල්පය. ආපහු සුදු වෑන් ගේන්න ද?. ආයිත් ජාතිවාදයට ආගම්වාදයට යන්න ද? තමන්ගේ අදහස් හැර වෙන කෙනකුට අදහස් ප්‍රකාශ කිරීමට ඉඩ නොදෙනවා ද?. ඒ නිසා විශේෂයෙන්ම එය ආරක්‍ෂා කරන්න මේ අවස්ථාවේදී සිවිල් සමාජයේ ඔබ සියලූ දෙනාටම මම කියන්නේ ඒ වගේම පිට සිටින අයත් ඉන්නවා. අපි තව කතා කරනවා. අපි සෑම කෙනාටම කියන්නේ අපි ඔක්කොම එකතු වෙලා මේ සැරේ අපේ අපේක්‍ෂකයාව ජයග්‍රහණය කරන්න අපි ක්‍රියා කරමු කියලා.

අන්න එයයි අපට ගන්න තිබෙන පළමු වන පියවර. මේක අපේක්‍ෂකයාගේ ජයග්‍රහණයටත්, අපි එන පෙරමුණේ ජයග්‍රහණයක් හැටියට හිතන්න එපා. මෙය තමන්ගේ ප්‍රජාතන්ත්‍රවාදී අයිතිවාසිකම් තහවුරු කරලා ඒ වැඩකොටස අවසන් කරන්න යන ඒ සටනේ පළමු වැනි පියවර හැටියට අපි ක්‍රියා කරමු කියලා මම ප්‍රකාශ කරනවා.

මෙම අවස්ථාවට ශ්‍රී ඡයවර්ධනපුර විශ්වවිද්‍යාලයේ ජ්‍යෙෂ්ඨ කතිකාචාර්ය දඹර අමිල හිමි, නගර සැලසුම්, ජල සම්පාදන සහ උසස් අධ්‍යාපන අැමැති රාවුෆ් හකීම්, පාර්ලිමේන්තු මන්ත්‍රී ඒ.එච්.එම්.ෆවුසි යන මහත්වරුන් ප්‍රමුඛ දේශපාලනඥයින් හා සිවිල් සංවිධාන ක්‍රියාකාරීහු රැසක් එක්ව සිටියහ.



උපුටා ගැනීම දිනමිණ පුවත් පත ඇසුරෙනි

More News »