සුරාබදු පනතට අදාළ සංශෝධන වහා ගැසට් කරන්න

May 03, 2019 09.50am
feature-top
සුරාබදු පනතට අදාළ සංශෝධන වහාම ගැසට් කරන ලෙස ජනාධිපති මෛත්‍රීපාල සිරිසේන මහතා අදාළ අංශවලට උපදෙස් දුන්නේය. මත්ද්‍රව්‍ය මර්දනය සහ අපරාධ අවම කිරීම පිළිබඳ ඊයේ (2) පෙරවරුවේ ජනාධිපති කර්යාලයේ පැවති සාකච්ඡාවක දී ජනාධිපතිවරයා මෙම උපදෙස් ලබා දුන්නේය.

මත්ද්‍රව්‍ය වැරදි පිළිබඳ නීති දැඩිව ක්‍රියාත්මක කරමින් මතින් නිදහස් රටක් ගොඩනැඟිමේ වැඩපිළිවෙළ ශක්තිමත්ව සහ කඩිනම්ව ඉදිරියට ක්‍රියාත්මක කිරීමේ වැදගත්කම මෙහි දී ජනාධිපතිතුමා අවධාරණය කළේය.

එමෙන්ම රටේ අපරාධ අවම කිරීම වෙනුවෙන් ක්‍රියාත්මක වැඩපිළිවෙළේ ප්‍රගතිය ද සමාලෝචනයට ලක් කෙරිණි. විස මත්ද්‍රව්‍ය ආඥා පනතට අදාළ සංශෝධන ද කඩිනමින් සිදු කරන ලෙස ජනාධිපතිවරයා උපදෙස් මෙහිදී දුන්නේ ය. මත්ද්‍රව්‍යවලට ඇබ්බැහිවූවන් පුනරුත්ථාපනය සඳහා ගෙන යන වැඩපිළිවෙළ පිළිබඳව ද සාකච්ඡාවට ලක් වූ අතර, බන්ධනාගාරගතව සිටින මත්ද්‍රව්‍ය ජාවාරම්වලට සම්බන්ධ බරපතළ අපරාධකරුවන්

බූස්ස බන්ධනාගාරය වෙත ගෙනයාම සහ විශේෂ කාර්ය බළකායේ ආරක්ෂාව මත එම කටයුතු සිදු කිරීම පිළිබඳව ද මෙහිදී සාකච්ඡා විය.

මත්ද්‍රව්‍ය විශ්ලේෂණයට අදාළ රස පරීක්ෂක දෙපාර්තමේන්තුවේ ගැටලු පිළිබඳ ද සාකච්ඡා කෙරිණි.

ඇමතිනී තලතා අතුකෝරළ, ජනාධිපති ලේකම් උදය ආර්. සෙනෙවිරත්න, ආරක්ෂක ලේකම් ජෙනරාල් ශාන්ත කෝට්ටේගොඩ, වැඩබලන නීතිපති දප්පුල ද ලිවේරා යන මහත්වරුන් සහ වැඩබලන පොලිස්පති ඇතුළු ආරක්ෂක අංශ ප්‍රධානීහු මෙම සාකච්ඡාවට එක්ව සිටියහ.



උපුටා ගැනීම දිනමිණ පුවත් පත ඇසුරෙනි

More News »