දේශපාලන කුමන්ත්‍රණවලින් බලයට ඒමට දකින සිහින නිෂ්ඵලයි

Jul 06, 2017 09.50am
feature-top
බලයේ සිටියදී කෝටි ප්‍රකෝටි ගණන් ජනතා මුදල් සහ රාජ්‍ය වත්කම් ගසා කමින් බලය අනිසි ලෙස භාවිත කර බරපතළ වංචා, දූෂණ සහ අපරාධ සිදු කළ අය නැවත තමන් බලයට පැමිණෙන බව ජනතාවට පෙන්වීමට උත්සාහ දරමින් සිටින බව ජනාධිපතිවරයා පවසයි. පහත් දේශපාලන කුමන්ත්‍රණ සිදු කරමින් කරන එම උත්සාහයන් කිසිසේත් සඵල කරගත නොහැකි අතර අදට මෙන්ම හෙටට රටට අවශ්‍ය වැඩපිළිවෙළ මේ වන විට වත්මන් රජය විධිමත් අයුරින් ක්‍රියාවට නංවා තිබෙන බවද ජනාධිපතිවරයා කියා සිටියේය.

ජනාධිපති මෛත්‍රීපාල සිරිසේන මහතා මේ බව ප්‍රකාශ කළේ ඊයේ (05) පස්වරුවේ අරලියගහ මන්දිරයේ පැවති සැමට සෙවණ ,විරුසුමිතුරු, රණවිරු නිවාස ඔප්පු ප්‍රදානයේ සමාරම්භක උත්සවය අමතමිනි.

ක්‍රියාන්විතයේදී දිවි පිදු හා ආබාධයට ලක් වූ ත්‍රිවිධ හමුදාවේ, පොලිසියේ සහ සිවිල් ආරක්ෂක බළකායේ රණවිරුවන්ගේ පවුල්වල නිවාස ගැටලුවට විසඳුමක් ලබාදීමේ අරමුණින් නිවාස ඒකක 3,650 ක් ඉදිකිරීමට ජනාධිපති මෛත්‍රීපාල සිරිසේන මහතාගේ උපදෙස් පරිදි ආරක්ෂක රාජ්‍ය අමාත්‍ය රුවන් විජේවර්ධන මහතාගේ මෙහෙවීමෙන් ක්‍රියාත්මක විරුසුමිතුරු නිවාස ව්‍යාපෘතිය යටතේ ඉදිකළ නිවාස 192 ක් රණවිරු අයිතියට පවරා දෙමින් ඔප්පු ප්‍රදානය කිරීම මෙහිදී සිදු විය.

මෙම උත්සව සභාව ඇමතූ ජනාධිපතිවරයා වැඩිදුරටත් සඳහන් කළේ අද අවශ්‍ය වන්නේ පටු දේශපාලන කුමන්ත්‍රණ නොව රටේ ස්වාධීනත්වය සහ ඒකීයභාවය වෙනුවෙන් විරෝදාර රණවිරුවන් කළ පරිත්‍යාගය තුළින් රටත්, ජනතාවත් ලැබූ ජයග්‍රහණය තවදුරටත් තහවුරු කර ගනිමින් ඉදිරියට යාම බවයි.

රට තුළ ස්ථිර සාමයක් ගොඩනගමින් ජාතික සමගිය සහ සංහිඳියාව ගොඩනැංවීමට වත්මන් රජය කැපවී කටයුතු කරද්දී අනාගත බලය පිළිබඳ සිහින දකින ඇතැම් අවස්ථාවාදී දේශපාලනඥයින් රට තුළ අසමගිය වැපිරීමට උත්සාහ දරන බව ද මෙහිදී ප්‍රකාශ කළ ජනාධිපතිවරයා එම කුමන්ත්‍රණ පරාජය කිරීමට සියලු ශ්‍රී ලාංකික ජනතාව ඒකරාශි විය යුතු බව ද කියා සිටියේය.

විරෝදාර රණවිරුවන්ට ජාත්‍යන්තර අධිකරණය වෙත යාමට තිබූ තත්ත්වය වෙනස් කර ලෝකයේ කිසිදු රටකට හෝ ජාත්‍යන්තර සංවිධානයකට ඔවුන්ට අත තැබීමට නොහැකිවන අයුරින් ජාත්‍යන්තරයේ සියලුදෙනාගේ සහයෝගය ලබාගැනීමට වත්මන් රජය කටයුතු කළ බව ද ජනාධිපතිවරයා සඳහන් කළේය.

මේ රටේ මාධ්‍යවේදීන් ඝාතනය කරමින් සහ ඔවුන් අතුරුදහන් කරමින් මාධ්‍ය ආයතනවලට ගිනි තැබූ යුගය අවසන් කර සියලු මාධ්‍යවේදින්ගේ ජීවිත ආරක්ෂා කිරීමට මෙන්ම මාධ්‍ය ආයතනවලට අවශ්‍ය පහසුකම් සපයා දීමට කටයුතු කළ වත්මන් රජයම විවේචනය කරමින් රට තුළ ගැටලු ඇති බවට ජනතාවට පෙන්වීමට උත්සාහ කරන ඇතැම් මාධ්‍ය ආයතනවල ක්‍රියාකලාපය පිළිබඳ තමා කනගාටුවන බව ද ජනාධිපතිතුමා ප්‍රකාශ කළේය.

රණවිරුවන් රටට ලබාදුන් නිදහස මෙන්ම රණවිරුවන්ද ආරක්ෂා කිරීමට වත්මන් රජය කටයුතු කරන අතරම රණවිරු සුබසාධනය වෙනුවෙන් රජය ක්‍රියාත්මක කළ වැඩපිළිවෙළ යටතේ ඉතා කෙටි කාලයක් තුළ රණවිරු නිවාස ප්‍රශ්නය සම්පූර්ණයෙන් විසඳීමට රජයට හැකිවනු ඇති බවද ජනාධිපතිවරයා සඳහන් කළේය.

ජනාධිපතිවරයා අතින් රණවිරුවන් දස දෙනකු වෙත නිවාස ඔප්පු ප්‍රදානය කෙරිණි.

අමාත්‍ය සජිත් ප්‍රේමදාස, රාජ්‍ය අමාත්‍ය රුවන් විජේවර්ධන, නියෝජ්‍ය අමාත්‍ය ඉන්දික බණ්ඩාරනායක යන මහත්වරුන් ද ත්‍රිවිධ හමුදා ප්‍රධානින්, පොලිස්පති, සිවිල් ආරක්ෂක දෙපාර්තමේන්තුවේ අධ්‍යක්ෂ ජනරාල් සහ රණවිරු සේවා අධිකාරියේ සභාපතිනි අනෝමා ෆොන්සේකා මහත්මිය ඇතුළු පිරිසක් මෙම අවස්ථාවට එක්ව සිටියහ.



දිනමිණ පුවත්පත ඇසුරෙනි

More News »