හර්ෂණයි මමයි ගිවිසුම් ගහගෙන රඟපාන්නේ නැහැ

Nov 03, 2018 10.46am
feature-top
වොල්ගා මේ දවස්වල රංගන කටයුතු නිසා කාර්යබහුලද?

මේ දවස්වල "අපේ ආදරේ" සහ රවින්ද්‍ර විජේරත්නගේ සුරියවච්චසා කියන නාට්‍යවල රූගත කිරීම්වලට එකතුවෙලා ඉන්නවා. ලොකුවට කාර්යබහුල වෙන්න මම කැමැති නැහැ.
කරන නිර්මාණවලට මගේ දායකත්වය උපරිමය මම දෙනවා.

මේ දවස්වල පේන්න ඉන්න නිර්මාණවලින් වැඩිපුරම ප්‍රතිචාර ලැබෙන්නේ මොන නිර්මාණය වෙනුවෙන්ද?

මේ නාට්‍ය දෙක දෙවිධියක්. අපේ ආදරේ නාට්‍ය වෙනුවෙන් තමයි වැඩිපුර ප්‍රතිචාර ලැබෙන්නේ. ඒ නාට්‍ය පසුගිය සුමති සම්මාන උළෙලෙදී ජනප්‍රියම නාට්‍ය බවටත් පත්වුණා. ඒක ලස්සන ආදර කතාවක්. ඒ නිසා ගොඩක් අයගෙන් ප්‍රතිචාර ලැබෙනවා.

හර්ෂණ එක්ක රඟපාන්න ලැබෙන නිසා ඒ ආදර කතාව තවත් ලස්සන කරන්න වොල්ගාට අවස්ථාව ලැබෙනවා ඇති?

මට හර්ෂණව ගොඩක් දැනෙනවා. ඒ එයා මගේ සැමියා නිසා. ධනුක, හර්ෂණ, පැතුම් මේ හැමෝම එක්ක රඟපාන්න පහසුයි.

දෙන්නව දිගටම එකම නිර්මාණ ඇතුළේ දකින්න ලැබෙයිද?

අපි ගිවිසුම් ගහගෙන රඟපාන දෙන්නෙක් නෙමෙයි. හර්ෂණ ටිකක් වැඩිපුර වැඩ කරනවා. මම ටිකක් අඩුවෙන් වැඩ කරන්නේ. මම එන හැමදේම භාරගන්නේ නැහැ. හොඳ දෙයක් නම් අපි දෙන්නට සම්බන්ධ වෙන්න ගැටලුවක් නැහැ.

වොල්ගා අඩුවෙන් වැඩ කරන්නේ බිරියකගේ වගකීම් මඟහැරගන්න අකැමැති නිසාද?

මම මගේ වගකීම් ඉෂ්ට කරනවා. මම සාමාන්‍යයෙන් එකම චරිතයකට කොටුවෙලා ඉන්න කැමැති නැති කෙනෙක්. වෙනස් වෙනස් චරිත කරන්න බලාගෙන ඉන්න නිසා තමයි මම හැමදාම පේන්න නැත්තේ.

ඔය තෝරා ගැනීම් එක්ක වැඩ කරන නිසා නේද වොල්ගාට සුමති සම්මාන උළෙලෙදී නැඟී එන නිළි සම්මානය හිමිවුණෙත්?

ඇත්තටම ජයප්‍රකාශ් සිවගුරුනාදන් මහත්මයාගේ 'එකගෙයි මිනිස්සු' ටෙලි නිර්මාණය නිසා තමයි මට ඒ සම්මානය ලැබුණේ. ඒක මට විතරක් ලැබුණු සම්මානයක් නෙමෙයි. ඒ නිර්මාණයේ හැමෝටම ලැබුණු සම්මානයක්. ඔවුන් හැමෝගෙන්ම මට හොඳ සහායක් නොලැබුණා නම් මට ඒ සම්මානය ලබා ගන්න තැනට යන්න බැරි වෙන්න තිබ්බා.

තෝරා ගැනීම් කරද්දී මේ වගේ සම්මාන ගැන බලාපොරොත්තු තියෙන්න ඇති නේද?

ඇත්තටම මම මේ සම්මානය ගැන බලාපොරොත්තුවෙන් හිටියේ නැහැ. හැබැයි ජයප්‍රකාශ් සිවගුරුනාදන් මහත්මයාගේ හිතේ ලොකු බලාපොරොත්තුවක් තිබුණා. මම සම්බන්ධ වුණු පළමු නාට්‍ය අධ්‍යක්‍ෂණය කළෙත් ඔහු. ඔහු හැමදාම කිව්වේ වොල්ගා හොඳ නිළියක් වෙයි කියලා.

වොල්ගා ජීවිතේ කවදාහරි දවසක රංගනයට දායක වෙන්න කැමැති විශේෂ චරිතයක් තියෙනවාද?

ඔව්, ෆැෂන් චිත්‍රපටයේ වගේ මත්ද්‍රව්‍යවලට ඇබ්බැහි වූ කාන්තාවකගේ චරිතයක් කරන්න මම කැමැත්තෙන් ඉන්නවා. සුමුදු වෙල්ලාලගමගේ කරපු ටෙලි චිත්‍රපටයක නම් මම ඒ වගේ චරිතයක් කළා. ඒ වගේ චරිතයක් ලැබුණොත් මම හරිම කැමැත්තෙන් භාරගන්නවා.

වොල්ගා ඕනම චරිතයක අභියෝගයක් භාරගන්නවාද?

රංගන ශිල්පිනියකට ඕනම චරිතයක් සීමා ඇතුළේ කරන්න පුළුවන්කම තියෙන්න ඕන. සීමා ඇතුළේ මමත් ඒ අවශ්‍ය චරිතයට දායකත්වය ලබා දෙනවා.

හර්ෂණ වොල්ගාගේ තේරීම්වලට වාරණ දානවාද?

එයා එහෙම වාරණ දාන්නේ නැහැ. අවශ්‍ය දේ අවශ්‍ය තැනදි මට කියනවා. එයා තමයි කැමැති මම රඟපානවට. ඔයා හොඳ නිළියක් වෙන්න ඕන කියලා එයා කියනවා. එයා මට අනවශ්‍ය විදියට බලපෑම් කරන්නේ නෑ.

විවාහයත් එක්ක සමහරු රංගනයෙන් අෑත් වෙනවා. හර්ෂණගෙන් වාරණ නැති නිසා වොල්ගා නම් රංගනයෙන් අෑත් වෙන එකක් නෑ නේද?

මවක් වුණු දවසක නම් ටික කාලයකට රංගනයෙන් අෑත්වෙයි. මේක මම මහන්සියෙන් ආපු තැනක්. ආදරය කරන තැනක්. රංගනය මම අතහරින එකක් නැහැ.

ඒ කියන්නේ වොල්ගා මවකගේ භූමිකාවට දැන්ම ළං වෙයිද?

අපි දෙන්නම දෙවියෝ බුදුන් අදහනවා. අපි මොන දෙයට වුණත් කොච්චර දැඟලුවත් ඒවා අපිට ලැබෙන නිසි වේලාවක් තියෙනවනේ. යම් තැනක ලියලා තියෙන විදියට අපිට ඒ දේවල් ලැබෙයි.

වොල්ගාගේ ජීවිතේ ඊළඟ බලාපොරොත්තුව මොකද්ද?

කවදා හරි රංගනයෙන් හොඳම නිළිය වෙන හීනයක් තියෙනවා. ඒක වෙයිද නැද්ද දන්නේ නෑ. වෙන නම් මහ ලොකු බලාපොරොත්තු නෑ.

වොල්ගාට ගොසිප් හැදෙන්නේ නැනේ. ඒ වොල්ගා ගොඩක් පරෙස්සම් වෙන නිසාද?

මම ක්ෂේත්‍රයට ආපු දවසේ ඉඳන් ජනප්‍රියයි. අනවශ්‍ය විදියට ජනප්‍රිය වෙන්න මට කවදාවත් ඕන වුණේ නැහැ. මම ඉන්න විදියක් තියෙනවා. ඒ ඉන්න විදියට කැමැති ප්‍රේක්‍ෂකයෝ තාමත් මට ආදරය කරනවා.

උපුටා ගැනීම මව්බිම පුවත්පත ඇසුරෙනි

More News »